Түркістан облысында мемлекеттік лагерьлер желісі кеңейіп, алғаш рет жыл бойы қызмет көрсететін «Алатау» оқу-сауықтыру орталығы жыл бойы қарқынды жұмыс жүргізді. Бұл маңызды жоба Мемлекет басшысының балалардың қауіпсіз әрі сапалы демалысын ұйымдастыру жөніндегі тапсырмасына сәйкес жүзеге асырылып отыр.
Түркістан облысы әкімінің тікелей қолдауымен Төлеби ауданының Тасарық ауылдық округінде орналасқан бұрынғы әлеуметтік қорғау жүйесіне қарасты лагерь ғимараты облыстық білім басқармасының теңгеріміне берілді. Нәтижесінде заманауи талаптарға сай жаңғыртылған оқу-сауықтыру орталығы ашылып, балалар игілігіне қызмет етуде.
Енді Түркістан облысының оқушылары жыл он екі ай бойы сауықтыру лагерінде демалып қана қоймай, білімдерін жетілдіруге де мүмкіндік алады. Орталықта жыл сайын 5 мыңға жуық оқушыны қамту жоспарланған.
«Алатау» оқу-сауықтыру орталығы балалардың сапалы демалысын ұйымдастырып, денсаулығын нығайтуға, шығармашылық және зияткерлік әлеуетін дамытуға бағытталған жаңа білім беру алаңына айналмақ.
